បេក្ខជនបណ្ឌិត ជា ជេដ្ឋ ការពារបញ្ចប់និក្ខេបបទថ្នាក់បណ្ឌិត
បេក្ខជនបណ្ឌិត ជា ជេដ្ឋ សិក្សានៅមហាវិទ្យាល័យនីតិសាស្រ្ត នៃសាកលវិទ្យាល័យចំរើនពហុបច្ចេកវិទ្យា បានចូលមកការពារបញ្ចប់និក្ខេបបទថ្នាក់បណ្ឌិតរបស់ខ្លួន នារសៀលថ្ងៃទី២៣ កុម្ភៈ ២០១០ នេះ។
ពិធីការពារបញ្ចប់និក្ខេបបទថ្នាក់បណ្ឌិតនេះ ធ្វើឡើងក្រុមប្រឹក្សាវាយតម្លៃនិក្ខេបបទថ្នាក់បណ្ឌិតចំនួន៧រូប ដឹកនាំដោយសាស្រ្តាចារ្យបណ្ឌិត ផុន ប៊ុនថាល់ ជាប្រធាន និងមានតំណាងមកពីក្រសួងអប់រំមួយរូបក៏បានអញ្ជើញចូលរួមផងដែរ។
និក្ខេបបទដែលបេក្ខជនបណ្ឌិត ជា ជេដ្ឋ ធ្វើការសិក្សាស្រាវជ្រាវនេះផ្តោតលើប្រធានបទ ស្តីពីបរិបទនៃអំពើពុករលួយនៅព្រះរាជាណាចក្រកម្ពុជា។
តាមការបកស្រាយរបស់បេក្ខជនបណ្ឌិត ជា ជេដ្ឋ ដែលបានធ្វើការបំភ្លឺពីគោលបំណង នៃការសិក្សាស្រាវជ្រាវលើប្រធានបទនេះ គឺក្នុងគោលដៅស្វែងយល់ និងរកឲ្យឃើញនូវឬសគល់ នៃអំពើពុករលួយ ដែលបានកើតឡើង ពិសេសរកមូលហេតុនៃអំពើពុករលួយ ដែលកើតឡើងនៅក្នុងស្ថាប័នរដ្ឋ ក៏ដូចជាឯកជន និងអង្គការសង្គមស៊ីវិលនានា និងធ្វើការវាយតម្លៃពីផលប៉ះពាល់ទាំងឡាយ ដែលកើតមានក្នុងសង្គម ទាំងផ្នែកនយោបាយ សេដ្ឋកិច្ច សង្គមកិច្ច ជីវភាពរស់នៅរបស់ប្រជាពលរដ្ឋ ព្រមទាំងពិនិត្យមើលចំពោះវិធានការគ្រប់គ្រងនិងទប់ស្កាត់អំពើពុករលួយឲ្យមានប្រសិទ្ធិភាព។
បន្ទាប់ពីបានស្តាប់ការបកស្រាយពន្យល់ពីបេក្ខជនបណ្ឌិតរួចមកក្រុមប្រឹក្សាវាយតម្លៃនិក្ខេបបទថ្នាក់បណ្ឌិត នៃសាកលវិទ្យាល័យចំរើនពហុបច្ចេកវិទ្យា បានពិគ្រោះពិចារណា និងលើកជាទស្សនៈរួមថា ប្រធានបទនេះពិតជាមានសារៈសំខាន់ ព្រោះនឹងក្លាយជាអត្ថបទវិទ្យាសាស្រ្ត ដែលជាប្រយោជន៌ដល់ស្ថាប័នដឹកនាំ សិស្ស-និស្សិត អ្នកសិក្សាស្រាវជ្រាវផ្នែកច្បាប់ សង្គមសាស្រ្ត អប់រំ អង្គការក្រៅរដ្ឋាភិបាល និងផ្នែកដ៏ទៃទៀត បានស្វែងយល់ច្បាស់អំពីដើមហេតុនៃអំពើពុករលួយ ផលប៉ះពាល់នៃអំពើពុករលួយ និងចេះរិះរកវិធានការទប់ស្កាត់និងលប់បំបាត់អំពើពុករលួយឲ្យមានប្រសិទ្ធិភាពក្នុងសង្គមកម្ពុជាយើង។ ក្រោយពីបានពិភាក្សា និងវិនិឆ័យយ៉ាងច្បាស់លាស់លើខ្លឹមសារនិងស្នាដៃប្រធានបទរួចមក ក្រុមប្រឹក្សាវាយតម្លៃបានសម្រេចប្រកាស់ទទួលស្កាល់បេក្ខជនបណ្ឌិត ជា ជេដ្ឋ ជាបណ្ឌិតចាប់ពីពេលនេះតទៅ។
(រៀបចំនិងដកស្រង់អត្ថបទដោយ ប៉ាង យួងថាមពល)